"منير في السينما والدراما... أعمال زادت شهرتها بفضل صوت “الكينج

منير... بين السينما والدراما

كلنا عارفين أغاني منير وألبوماته. عيشنا معاها كتير وبقى مصاحبنا في مواقف كتير في حياتنا. لكن بالإضافة لألبوماته ومشروعه الغنائي الثري، نقدر نقول إن منير كانت ليه بصمة في السينما والدراما، بدأت من سنة 1977 ولحد سنة 2023. قدم خلالهم تترات للمسلسلات أو أغاني للأفلام، وفي الحالتين صوته كان إضافة مهمة لكل عمل، ونقدر نقول إن في أعمال نجحت وارتبطت مع الجمهور بصوت منير.

الكينج في السينما

منير مكانش مجرد مغني بيضيف أغنية لأحداث الفيلم، ده في أوقات كتير كان هو اللي بيحرك الفيلم جماهيريًا. منير بيغني في الفيلم أو إعلان الفيلم بصوت منير يبقى الفيلم مهم وفيه أحداث تخلي الجمهور يشوفه.

أفلام كتير زي "حدوتة مصرية" إنتاج 1982 و"المصير" إنتاج 1997 لحد "أحلى الأوقات" إنتاج 2004 وغيرهم كتير، كان أهم سبب في حبنا ليها هو صوت منير. أغاني زي "حدوتة مصرية" و"عليّ صوتك" و"الدنيا ريشة في هوا" كانت من أهم أسباب ارتباطنا بأعمال سينمائية مهمة.

 منير في الدراما... قصة لوحده

من سنة 1977 في مسلسل أنهار الملح" ومنير سايب بصمته في الدراما. أغانيه في المسلسلات كانت بتتسمع حتى لو المسلسل نفسه مش بيتشاف.

منير قدم أكتر من 18 تتر مسلسل بصوته، واللي كان من ضمنهم مسلسل "المغني" اللي كان بطولته، ويعتبر العمل الدرامي الثالث اللي بيشارك فيه منير بعد مسلسلات "جمهورية زفتى" إنتاج سنة 1998 ومسلسل "علي عليوة" إنتاج سنة 1992.

تأثير منير الإيجابي على العمل الفني قبل المشاهدة

بعض الأعمال اللي منير قدم فيها أغاني، كان هو بنفسه يعتبر العنصر الرئيسي لنجاح العمل.

المسلسل الكارتوني "بكار" اللي بدأ إنتاجه سنة 1998، واللي بيحكي عن الطفل الأسواني بكار، لما فكروا مين يغني تتر المسلسل مكانش فيه أفضل من منير يقدم صوت النوبة وينقله للعالم العربي كله.

وفي أحداث فيلم "أحلى الأقات" اتبنت القصة كلها تقريبًا على منير. الأبطال اجتمعوا على خيط درامي مبني كله على شرايط محمد منير. حتى لما نزل إعلان الفيلم كانت أغنية "الدنيا ريشة في هوا" بصوته.

وفي 2012، صناع مسلسل "الهروب" قالوا إنهم مالقوش أفضل من أغنية "يا أهل العرب والطرب" تنفع تكون تتر المسلسل عشان هي أكتر حاجة بتعبر عن أحداثه.

صوت منير في كل بيت

بدون قصد وبدون مقدمات، منير كان جزء من حياة المصريين، لو مش في الألبومات يبقى بطرق تانية. في الأفلام اللي حبيناها، في المسلسلات اللي جمعتنا في البيوت. الجزء ده فضل يكبر ولسه مكمل لحد النهاردة.